اطلاعات کے مطابق مکہ مکرمہ میں کورونا کے کیسز میں تیزی سے اضافہ ہورہا ہے جہاں وزارت صحت کے مطابق گزشتہ روز 623کیسز سامنے آئے۔ جن دنوں مکہ مکرمہ میں کرفیو رہا ان دنوں میں سب سے کم کیسز 103رہے۔کیسز میں کمی کے بعد حکومت نے کرفیو میں صبح چھ سے دن تین بجے تک نرمی کی تو کیسز کی تعداد میں اچانک اضافہ ہونا شروع ہوگیا اور اب تک ایک دن میں سب سے زیادہ 623 کیسز سامنے آچکے ہیں۔
کیسز کی تعداد زیادہ ہونے پر آج کرفیو سخت کر دیا گیاہے ہر گلی میں سکیورٹی اہلکار موجود ہیں اور وہ آج کسی کو بھی گھر سے باہر نہیں نکلنے دے رہے۔
دوسری جانب العربیہ کے مطابق
سعودی عرب میں گزشتہ 24 گھنٹے میں کرونا وائرس کے 3045 نئے کیسوں کی تصدیق ہوئی ہے جس کے بعد مملکت میں اس مہلک وائرس کا شکار ہونے والے مریضوں کی تعداد ایک لاکھ سے متجاوز ہوگئی ہے۔
سعودی وزارت صحت نے گذشتہ دو روز میں تین ہزار سے زیادہ کیسوں کی اطلاع دی ہے۔اتوار کو کووِڈ-19 میں مبتلا مزید 36 مریض وفات پا گئے ہیں اور اب متوفیوں کی کل تعداد 712 ہوگئی ہے۔
وزارت صحت نے کرونا وائرس کا شکار مزید 1026 مریضوں کے تن درست ہونے کی بھی اطلاع دی ہے۔اس طرح اب تک کل 101914 مریضوں میں سے 72817 شفایاب ہوچکے ہیں۔
سعودی عرب میں کرونا وائرس کے حالیہ رجحانات کے مطابق دارالحکومت الریاض میں سب سے زیادہ 717 کیس رپورٹ ہوئے ہیں۔اس کے بعد مکہ مکرمہ میں 623 اور جدہ میں 351 کیسوں کا اندراج ہوا ہے۔مشرقی شہر الدمام میں بھی کرونا کے کیسوں میں نمایاں اضافہ ہوا ہے اور وہاں محکمہ صحت کے حکام نے 257 نئے کیسوں کی تصدیق کی ہے۔