سال 21-2020 کیلئے سندھ کا بجٹ آج پیش کیا جائے گا

سندھ اسمبلی کا بجٹ اجلاس آج دوپہر دو بجے شروع ہو گا اور وزیراعلی سندھ مراد علی شاہ جو صوبائی وزیر خزانہ بھی ہیں صوبے کا بجٹ پیش کریں گے۔

کورونا وائرس کے پھیلاؤ کی وجہ سے سندھ اسمبلی کے قواعد و ضوابط میں گزشتہ روز تبدیلی کی گئی تھی جس کے بعد ارکان اپنے گھروں سے اجلاس میں آن لائن شریک ہو سکیں گے۔ 

ذرائع کے مطابق اجلاس کے دوران ایوان میں 25 فیصد ارکان موجود ہوں گے۔ 

ذرائع کا کہنا ہے  اس سے قبل سندھ کابینہ کا پری بجٹ اجلاس بھی وزیر اعلی ہاؤس میں ہو گا جس میں سندھ کابینہ بجٹ تجاویز کی منظوری دے گی۔ 

بجٹ اجلاس کے موقع پر سندھ اسمبلی کے اندر اور  باہر خصوصی انتظامات کیے گئے ہیں۔ سندھ اسمبلی میں صرف وہ ارکان ایوان میں آ سکیں گے جن کے کورونا ٹیسٹ کا نتیجہ منفی آیا ہے۔ 

ذرائع کے مطابق اب تک سندھ اسمبلی کے 15 ارکان کا کرونا ٹیسٹ مثبت آ چکا ہے اور ان میں کئی ارکان صحت یاب بھی ہو گئے ہیں۔