ایمازون کا سوشل میڈیا سلیبرٹی کے ساتھ کاروبار کا منصوبہ

ایمازون اپنی مصنوعات کی فروخت بڑھانے کے لیے ان سوشل میڈیا شخصیات کے ساتھ کمیشن کے تحت کاروبار کرنے کا ارادہ رکھتی ہے، جن شخصیات کے انسٹاگرام، یوٹیوب، فیس بک اور ٹوئٹر جیسی دیگر سوشل سائٹس پر لاکھوں فالوئرز ہوں گے۔

ایمازون نے اس منصوبے کی تجرباتی سروس شروع کردی ہے، جب کہ اس منصوبے کو آنے والے دنوں میں باضابطہ طور پر شروع کردیا جائے گا۔

ایمازون کے مطابق اس منصوبے کے تحت ان سوشل میڈیا سلیبرٹی کو کمیشن فراہم کیا جائے گا، جو ان کی مصنوعات کو اپنے سوشل پیجز پر فروخت کریں گے۔

یہ بھی پڑھیں: 

ایمازون کا برطانیہ میں ڈرونز سے ترسیل کا منصوبہ

منصوبے کے تحت سوشل میڈیا پر لاکھوں فالوؤرز رکھنے والی شخصیات کو ان کے نام کا علیحدہ یو آر آیل ایڈریس بنا کر دیا جائے گا اور شخصیات اپنی مرضے کے آئٹمز کو اپنے پیج پر فروخت کرکے ایمازون سے کمیشن حاصل کر سکیں گی۔

ایمازون نے اس منصوبے کے تحت دی جانے والی کمیشن کی مالیت نہیں بتائی، تاہم خیال کیا جا رہا ہے کہ اس منصوبے میں بہت ہی معروف شخصیات کو شامل کیا جائے گا، جنہیں بھاری کمیشن دیا جائے گا۔

اس منصوبے کا حصہ بننے والی شخصیات کو amazon.com/shop/username کے طرز پر اپنے اپنے نام سے الگ الگ پیج بنا کر دیا جائے گا، جس پر وہ شخصیات اپنی من پسند مصنوعات کو فروخت کے لیے پیش کریں گی۔